Dula-dula sa duha

Ayaw, ayaw tayhopa ang lamig-
ayaw dal-a sa imohang puy-anan,
ayaw gayod,
ayaw pahilaka ang akong mga mata-
halang ini tungod sa imohang tayhop,
ayaw, ayaw pahilaka ang kapuy kung mga
mata
gusto pa niini makit-an ang
paggawas sa adlaw,
ang siga sa buntag
nga mutilap sa uhaw nako nga dughan-
ayaw, ayaw,
pasagdi lang mi,
mabuhi mi biskan wala ka
(kay naa man gayod ka pirminti)

Tungod sa imo
mabuhi mi,
tungod pud sa imoha mamatay mi
ayaw unta mi baya-i maski
ang uban kay nibiya na kanimo-
masabtan unta nimo nga dili tanan matagaan ug atensiyon
sama sa imoha na maski asa lang nagapahayahay-
didto sa tungod o maski asa pa man,
pero sa tinuod lang gihandom pud nako
nga makatapak ko sa imohang puy-anan
kung asa pwede taka maubanan-
musayaw ta, magkanta
maghulat sa ilaha-
(makit-an unta ta nilang duha
para unta ikalipay pud nila ang
atong “existence”,
bahala na dili parehas sa atensiyon
nga ginahatag nila sa kalayo,
ug tubig)
unsa man ilahang gusto
tayhupan nato ang ilahang mga mata
para matilawan nila kung unsa ang tinuod natong gibati
o pasagdan nalang,
tutal,kinsa lang man ta diba?
Ikaw hangin ug ako
usa lamang ka tanom nga nagahulat ug bisbis.