Tunô

Nilingkod , nibilangkad
Gipatung-an ang ulo sa kaguran
Gikablot ang gipikas nga lubi
Ibabaw sa lababo-
Ang unod puti, gahi
Gikulob ang lubi,

Gihinay- hinay ug kagod
sa gikapoy nga mga kamot
Ang gahi nga unod sa lubi
gikudkod,
gikudkod,
gikudkod ug samot
hantud mitulo ang singot
sa iyahang dughan
paadto sa iyahang uranay

Busa nag padayon gihapon ug kagod
Hinay
hinay
Paspas
Ug Hinay napud
ug usab

nahurot na ang mga lubi ug kagod
iya na kining gipuga
hantud ninggawas ang mga duga

gikutaw kutaw
ang sabaw sa gata

ug wala na kini magunitang lubi
gi sabyog ang gikagod paadto sa iyahag
ginasagod nga manok
ug hinay hinay ug trapo ang gata
sa iyahang buhok
mitulo ini nga murag singot-
paadto sa iyahang dughan
ngadto sa iyahang gipatung-an
ang ulo sa kaguran