Nia napud ko sa akong tugkaran
gunit kining mga labhonon sa akong amo
nga tulo ka tuig nga nakong kanunay
nga ginalabhan
asa ka diha,
mao gihapon ang baho
baho sa lawas nilang duha-
mura ba'g baho
nga gikan sa ilawm sa yuta
samtang akong gihinay-hinay ug bulag
ang de kolor sa puti
masimtan nako ang nimala
nga singot sa ilahang mga sinina
adunay higayon nga humot ini ug "sampaguita"
ug akong nalahi na ang mga sinina,
hinay-hinay nako ni ug tusmaw sa tubig
aron banlawan-
ang akong kamot
mukutaw-kutaw sa tubig
mupailawm
sa nawng sa palangganang naay liki
ang huni sa tubig akong madunggan-
murag mga hutik sa akong mga amo nga akong
nasinatian usa ka hapon;
hinay busa usab-usab nga hutik
nga murag hagikhik sa akong daluggan
(wa ko nila nakit-an sa gawas nga lipay nga gakusokuso)
saba kaayo ang kwarto-
di madunggan ang tagaktak sa tubig
gikuso nako ang sinina sa akong amo
hantud magisi ini,
aron wa na silay suoton
ug di na nako masimtan
ang parehas nga baho
sa ilahang mga lawas.
0 endeavored to criticize:
Post a Comment